【今日香港】
舊公司有位HR好勇敢，佢提議由5日半改為返5日，老闆聽完之後黑晒面，好多同事冷言冷語反問搞咁多嘢做乜？公司盤古初開已經係咁，點解要挑戰舊有制度？呢場角力賽持續咗大半年，最後公司真係改革為five-day work week，成班同事覺得：「關個HR咩事吖，老闆想慳燈油火蠟之嘛！」個HR喺呢段時間少咗好多朋友，個個當佢異見人士，結果意興闌珊下另謀高就，冇人覺得可惜，只係覺得星期六唔使返工爽YY。
雙學三子黃之鋒、羅冠聰、周永康，同埋反東北案13人分別被判入獄，好驚訝有人話開心到跳起Yeah，香港呢個地方係幾奇怪，犧牲自己去為市民發聲，有人會覺得佢哋多嚿魚；紮營瞓街搞抗爭，有人覺得佢哋阻住返工返學；公司今年冇花紅，有人覺得罪魁禍首係示威嗰班人；遇到唔合理嘅事走出嚟反抗，有人覺得不如認命咪L搞咁多嘢；想講出不公不義嘅事，有人會覺得你好嘈：「出少句聲啦，大家習慣咗喇。」
正如天與地嘅對白「和諧唔係一百個人講同一說話，和諧係一百個人有一百句唔同說話之餘，而又互相尊重。」所以33度大熱天時搞遊行，出去感受熱浪定係留喺屋企食熱浪，絕對係個人選擇，唔支持唔緊要，但唔好嘆住冷氣講風涼話。
Search